|
O proxecto europeo e-MINDER, no que participa o Centro de Competencias en Comercio Electrónico de Galicia, chegou ó seu remate en setembro. Despois de meses de intenso traballo, os resultados cadados nas tres rexións participantes no proxecto (Galicia, Chipre e Pomerania -Polonia-) cumpriron as expectativas iniciais.
O proxecto e-MINDER, que tiña como obxectivo crear unha rede de centros de comercio electrónico en Europa, chega ó seu remate. Dende setembro do 2001 e ata setembro deste ano, este proxecto IST do V Programa Marco da UE vén traballando na promoción do comercio-e e as novas tecnoloxías entre as PEMEs de tres rexións periféricas europeas: Pomerania (Polonia), Chipre e Galicia.
Na nosa comunidade, a aplicación práctica deste proxecto deu pé ó Centro de Competencias en Comercio Electrónico de Galicia, que botou a andar oficialmente en marzo do 2002 co apoio da Dirección Xeral de I+D da Consellería de Innovación, de Industria e Comercio da Xunta de Galicia e coa xestión do CESGA.
Actividades e informes
A nivel europeo, o proxecto e-MINDER elaborou estudios como o “Informe rexional sobre TIC e comercio electrónico”. Actualmente estase realizando o “Manual para a creación de centros de competencias en comercio electrónico en Europa”, do que poderán botar man outros países interesados en promocionar o negocio on line nas súas rexións. Neste sentido, o e-MINDER recibiu numerosas solicitudes de información de rexións europeas interesadas en promover esta canle de negocio entre as súas pequenas e medianas empresas.
Outras actividades desenvolvidas nas tres rexións participantes foron as enquisas e estudios sobre comercio-e, os cursos e conferencias (nas que se formaron máis de 2.600 empresarios de Chipre, Pomerania e Galicia), ou as revistas e páxinas web de carácter divulgativo publicadas polos participantes (partners) no proxecto.
Ademais, os tres centros desenvolveron servicios de asesoramento e soporte á PEME, no tocante ás TIC e ó comercio-e, que ata xullo prestou servicio a máis de 350 empresas.
e-MINDER presentou en público os seus resultados o mes de xullo en Bruxelas, nun evento (a chamada “Final Conference”) ó que asistiron membros da Comisión Europea, partners do proxecto, membros doutros proxectos europeos e medios de comunicación, entre outros.
En Galicia
A nivel galego, o proxecto e-MINDER tivo cumprido reflexo no Centro de Competencias en Comercio Electrónico de Galicia, que desenvolveu as súas actividades dende as áreas de formación, soporte, observatorio, comunicación e cooperación. Esta última área acadou un alto índice de participación nos seus dous primeiros meses de actividade. Neste sentido, o Centro forma parte da rede de centros e-MINDER, da European e-Business Support Network (eBSN) e da Rede Internacional para as PEMEs (INSME).
Nas páxinas deste último número de e-negociogalicia detallamos os resultados e os obxectivos acadados neste curto período de tempo.
DATOS DO PROXECTO
Proxecto: Information Society Technologies. V programa marco da Unión Europea.
Período do proxecto: Setembro 2001 - Setembro 2003
Orzamento: 4.345.318 euros.
Investimento en Galicia: 1.670.814 euros.
Participantes
Coordinador SchlumbergerSema (España)
Galicia: CESGA, Universidade de Santiago mde Compostela (USC) e Universidade da Coruña (UDC)
Pomerania (Polonia): Presidencia da Pomerania Computer Center Regional Data Bank
Chipre: Virtual IT, Cyprus Telecommunication Authority (CYTA) e UCY (University of Cyprus)
Enlaces e-MINDER
www.eminderproject.com
www.e-minder.com.cy (Chipre)
www.eminder.pl (Polonia)
www.e-negociogalicia.com (Galicia)
|
