“Permite chegar a públicos máis amplos”

José Antonio Noya está argallando a posta en marcha dunha páxina web. Para el, a Rede amplía as opcións de negocio: "Internet supón, como ferramenta e como canle, novas posibilidades de negocio, e permite levar adiante ideas propias. Ademais, xera máis interactividade co usuario ou cliente, o que supón un contacto máis persoal, bidireccional. Outra das posibilidades é que dá máis independencia que outras canles de negocio, aínda que seguen a ser necesarias as subvencións para sacar adiante os proxectos orientados á Rede. Ademais, a través de Internet podes chegar a públicos máis amplos ou máis específicos, segundo o producto ofertado".

“Ten proxección nun futuro inmediato”

Manuel Buezas García tamén ten entre mans un proxecto centrado en Internet: "Eliximos a Rede porque é a canle que cremos que ten máis proxección nun futuro inmediato. Como medio de establecer negocio é a ferramenta máis operativa, a que serve mellor ós nosos intereses á hora de xerar comercio electrónico. A Rede achega ó noso negocio unha utilidade fundamental: é un forte medio de expansión e abarca un espacio xeográfico maior. Mentres que a tenda física recorta o ámbito xeográfico de negocio, as posibilidades de expansión de Internet son moito maiores e pódense abarcar mercados moi diversos".