|
En febreiro deste ano había en España arredor de 45.000 páxinas co dominio ‘.es’. Coa aprobación do Plan Nacional de Nomes de Dominio de Internet, o goberno agarda duplicar esta cifra nos vindeiros doce meses.
O goberno aprobou en marzo un novo plan para a regulación do dominio ‘.es’ co obxectivo de fomentar o seu uso por parte das empresas e institucións españolas.
O novo plan reorienta as políticas que se estaban a levar a cabo e que non tiveron bos resultados. A comezos deste ano atopábanse na Rede 44.441 páxinas co dominio ‘.es’, segundo datos de Red.es, a entidade pública empresarial que xestiona o rexistro na Rede dos enderezos con este dominio. España aparece moi lonxe de países do noso contorno como Italia, que ten preto de 700.000 páxinas baixo o dominio ‘it’. Coa aplicación do plan, o goberno espera relanzar o uso do dominio español, sobre todo entre as empresas.
Dúas eran as causas fundamentais da pouca integración do dominio español. A complexidade do proceso de rexistro e o seu elevado prezo. O novo plan flexibiliza o proceso de rexistro. Faino sen perder os criterios de asignación que fan do sistema español un dos máis seguros do mundo. Ademais, o plan introduce 5 novos dominios: ‘.com.es’, ‘.nom.es’, ‘.org.es’, ‘gob.es’ e ‘.edu.es’. Sen embargo, pese a que se contempla unha reducción das tarifas, os prezos do ‘.es’ seguen a ser elevados. Así, o rexistro dun novo dominio español custa 72,12 euros e o mantemento anual 48,08 euros. Mentres, en Francia o rexistro dun dominio ‘.fr’ non chega ós 30 euros e o mantemento anual ós 15 euros.
¿Como solicitar on line un dominio ‘.es’?
A entidade pública Red.es é a autoridade competente na asignación de nomes de dominio baixo o ‘.es’. Na súa web as empresas teñen a posibilidade de cubrir o Formulario de Solicitude Electrónica (FSE), mediante o cal se pide a asignación dun nome de dominio. O FSE, ademais de dar de alta un nome de dominio, permite modificar os datos dun dominio xa existente, cambiar o nome dun dominio ou dar de baixa o nome. Unha vez enviado o FSE cos datos correctamente cubertos, a empresa solicitante recibirá por correo postal a factura co importe da tarifa de alta do dominio. A empresa deberá acreditar o pago para ter o seu dominio ‘.es’.
www.red.es
|
