|
Un bo exemplo do aproveitamento dunha extranet para mellorar a relación cos clientes é o de Frioya. Como se dun banco se tratase, esta empresa de almacenamento frigorífico informa ós seus clientes dos movementos, cantidades e traspasos de mercadoría que ten almacenada nos seus frigoríficos. A única diferencia respecto dun banco tradicional é que, en vez de cartos, almacena peixe conxelado.
Son as 8:30 da mañá e no peirao dos Frigoríficos Oya S.A., en Vigo, a actividade é febril. Decenas de traballadores descargan dos barcos peixe conxelado. En cuestión de minutos, centos de caixas almacénanse nas cámaras frigoríficas, a uns 22 graos centígrados baixo cero. Cada unha destas caixas queda perfectamente identificada e controlada, todo gracias a un proceso robotizado e automatizado dos máis avanzados de Europa neste eido.
Frioya adícase ó alquiler de espacio nos seus frigoríficos para as empresas armadoras ou comercializadoras de peixe. Trátase dun negocio no que os movementos de producto son constantes: ó longo dun ano, en Frioya móvense máis de 100.000 toneladas de peixe conxelado.
Por iso, a información é vital para todos. Os clientes necesitan saber en cada momento a cantidade exacta de peixe que ten almacenada, e Frioya non pode defraudar nin crear dúbidas.
Ata a creación da extranet, o proceso de información cara ó cliente baseábase no correo tradicional. Frioya enviaba (e aínda o fai) numerosas cartas con albaráns, facturas, detalle de movementos, etc. É un procedemento lento e custoso. Por iso, Frioya decidiu crear unha extranet, unha ferramenta que, a través de Internet, permite manter informados ós seus clientes con todo tipo de detalles, simplemente entrando na web (extranet) de Frioya e introducindo un nome de usuario e un contrasinal, que a empresa frigorífica entrega ós seus clientes. A extranet axiliza o traballo internamente e permite unha comunicación fluída co cliente , asegura Marcos Vaqueiro, xefe de mantemento.
INTEGRACIÓN
Foi en abril do 2002 cando, da man da empresa Northwest Technologies (empresa consultora e de desenvolvemento de software do grupo verticalia.com), Frioya puxo en funcionamento a extranet. Para iso, foi necesario integrar esta nova ferramenta co sistema de xestión (ERP) que emprega Frioya, o que requeriu a colaboración entre Northwest Technologies e o provedor do sistema de xestión: Edisa. Aínda que o do peixe é un sector tradicional, os clientes van empregando cada vez máis esta ferramenta. Quen máis demanda este servicio son as empresas estranxeiras, que poden paliar a lonxanía xeográfica con información actualizada en tempo real na extranet.
FASE 2
Pero Frioya quere seguir mellorando este servicio. Nestes momentos, Northwest Technologies e Edisa están a traballar na segunda fase do proxecto: pretenden dotar á extranet da interactividade necesaria para que os clientes non só consulten información, senón que tamén poidan realizar transferencias, peticións de saída ou entrada, etc.
Datos do proxecto
Empresa: Frigoríficos Oya S.A.
Facturación anual: 7 millóns de euros.
Proxecto: Creación dunha extranet en dúas fases: - Fase 1: Mellora do fluxo de información ó cliente.
- Fase 2: Interactividade (os clientes teñen a posibilidade realizar movementos de mercadorías).
URL: www.frioya.com, https://clientes.frioya.com
Investimento inicial no proxecto: - Fase 1: 12.000 euros (aplicación, hardware e seguridade).
- Fase 2: 23.200 euros (aplicación web e Oracle e seguridade).
(*) Non inclúe formación do persoal.
 |
| Funcionamento da extranet de Frioya |
|
